Türkiyədə dünya şöhrətli rejissor Lars fon Trierin "Nymphomaniac" (Seks düşkünü) filminin nümayişinə qadağa qoyulub.

"Axar.az" Türkiyə mətbuatına istinadən xəbər verir ki, bu filmin nümayişə girməsinin qadağan olunma səbəbi kimi "əxlaqa zidd" və "pornoqrafik görüntü və dialoqların olması" göstərilib.

Ekrana çıxacaq filmlərin reytinqini aparan qurum səs çoxluğuyla 14 martda birinci hissəsinin yayımlanması planlaşdırılan Lars fon Trierin "Nymphomaniac" filminin ekrana çıxmağına icazə verməyib.

Qurum dünən filmi izləyərək səs çoxluğu ilə ekrana çıxamamasına qərar verib. Hər kəs filmin "18+" başlığı altında ekrana çıxacağını gözləyirdi, ancaq "Nymphomaniac" bu şəkildə belə ekranlara çıxa bilməyəcək.

Qeyd edək ki, bu filmdə 50 yaşlı qadının uşaqlığından etibarən kişilərlə olan əlaqələrindən bəhs edilir. Filmdə Şarlotte Qeynsburq, Stellan Skarsqard, Steysi Martin, Cemi Bel, Uma Turman, Uilyam Defo kimi məşhur aktyorlar rol alıb. "Nymphomaniac" filmi keçən ay Berlin Film Festiavlında göstərilmiş və tənqidçilər tərəfindən yaxşı qarşılanmışdı.