Məşhur rusiyalı bloger Lerçekdə (əsl adı Valeriya Çekalinadır) dördüncü mərhələdə mədə xərçəngi aşkarlanıb. Xərçəngin bu mərhələsi sağalmaz hesab olunur.

Kult.az Oxu.az-a istinadla xəbər verir ki, bu barədə Çekalinanın rəfiqəsi Alina Akilova özünün Teleqram kanalında məlumat yayıb.

"Lerçeklə bağlı... Düzünü desəm, artıq üç gündür ağlayıram. Bütün bunlar - bizim balaca, kövrək qızımızın başına gələn hər şey əsl həqiqətdir. Metastaz vermiş dördüncü mərhələdə xərçəng", - deyə Akilova bildirib.

Həmçinin Akilova qeyd edib ki, Lerçekin analizlər verməsi üçün evdən çıxmasına icazə verilmirdi və bu səbəbdən də xeyli vaxt itirilib.

Bildirilir ki, dördüncü mərhələdə mədə xərçənginin tam müalicəsi ehtimalı çox azdır, çünki artıq ayrı-ayrı metastazlar mövcuddur. Müasir müalicə (kimyaterapiya, target preparatlar) əsasən xəstəliyin qarşısını almağa, şişi kiçiltməyə, ömrü uzatmağa və həyat keyfiyyətini yaxşılaşdırmağa yönəlib.

Xatırladaq ki, Valeriya Çekalina 250 milyon rubldan (5.37 milyon manat) çox vəsaitin BƏƏ-yə çıxarılmasında, 500 milyon rubl (10.74 milyon manat) vəsaiti vergidən gözlətməkdə, çirkli pulların yuyulmasında və s. ittiham olunurdu. Hazırda ev dustaqlığında olan bloger argentinalı rəqqas Luis Skviççiarinidən bir oğlan uşağı dünyaya gətirib.