Azərbaycan Dövlət Gənc Tamaşaçılar Teatrı Rusiyanın Perm
şəhərində keçirilmiş I Beynəlxalq Martin MakDonax Festivalından
geri qayıdıb.
Axar.az xəbər verir ki, oktyabr ayının 7-dən 14-dək davam edən
festivalda teatrın kollektivi "Lineynin trilogiyası"na daxil olan
"Yalqız Qərb" əsəri əsasında hazırlanmış eyniadlı
tamaşa ilə çıxış edib.
Quruluşçu rejissoru Böyük Britaniyadan dəvət olunmuş teatr
rejissoru Yan Uilem Van Den Boş, rejissoru Gülnar Hacıyeva, işıq
üzrə rəssamı Maykl Manyon, quruluşçu rəssamı Elizabet Kuk, rəssamı
Elşən Sərxanoğlu, musiqi tərtibatçısı Zaur Rəşidov olan tamaşada
rolları Nigar Məmmədova, Rasim Cəfərov, Anar Səfiyev, Vüsal
Mehrəliyev ifa ediblər.
"Yalqız Qərb" tamaşası oktyabr ayının 12-də Permdə fəaliyyət
göstərən "У моста" teatrının böyük səhnəsində nümayiş etdirilib.
Tamaşadan sonra münsiflər heyətinin iştirakı ilə müzakirələr və
permli jurnalistlərlə mətbuat konfransı keçirilib.
Tamaşa festivalın fəxri diplomuna və xüsusi mükafata layiq
görülüb.