Azərbaycan Milli Kitabxanasında 10 yaşlı şair Sevindik Nəsiboğlunun “Dünyamsan Azərbaycan” və “Hərdən uçmaq istəyirəm” adlı kitablarının təqdimatı olub.

Kult.az xəbər verir ki, mərasimdə çıxış edən Milli Kitabxananın direktoru Kərim Tahirov Sevindik Nəsiboğlunun cəmi 10 yaşı olmasına baxmayaraq, ədəbiyyata belə maraq duymasının təqdirəlayiq hal olduğunu bildirib.

Direktor qeyd edib ki, Sevindik həm də mütaliə edir və məhz bu keyfiyyət onun şeirlərində də özünü göstərir.

Professor Rafiq Yusifoğlu hər iki kitabın çap olunması və təqdimatı münasibətilə təbriklərini bildirib və Sevindik Nəsiboğlunun gələcəkdə yeni-yeni kitablarının çap olunmasını arzulayıb.

Digər çıxış edənlər də Sevindiyin çox böyük fitri istedada malik olduğunu, şeirlərində poetik bir üslub olduğunu, vətənpərvərlik üslubunda yazdığını bildiriblər.

Tədbirin sonunda 10 yaşlı şair “Zəngəzur” şeirini oxuyub, gələcək planlarından danışıb.