"Elçin Hüseynov məni təhqir etdi".

Bu sözləri stilist Anar "Maşın şou"nun dünənki buraxılışında Elçin Hüseynovla aralarında yaşanmış qalmaqalla bağlı Axar.az-a danışarkən deyib:

"Orada qruplaşmalar mövcuddur. Bununla yanaşı, 5 nəfərdən ibarət neytral bir qrup da mövcuddur. Mən isə tək bütün qruplaşmalara qarşı mübarizə aparıram. Elçin dünən məni tanımadığı təqdirdə "sən kimsən?" – deyib məni təhqir etdi. Sizcə, bu nə dərəcədə etikdir? Mən Elçini şəxsən tanımırdım, bir-birimizi "Maşın şou"da tanımışıq. Mənə səviyyə fərqimizdən dəm vurub istehza ilə yanaşdı. Çünki mənim potensial rəqib olduğumu orada hər kəs bilir.

İlk gündən demişdim ki, mən Roza Zərgərlini çıxaracam. Çünki Roza xanımın bir sözü ilə digəri üst-üstə düşmür, o, publikaya oynayır və özünü olduğu kimi yox, başqa biri kimi aparır. Sözümü dedim və dediyimi də etdim. Mübarizəni açıq şəkildə aparmaq lazımdır. Elçin isə dünən kimisə vuracağını dilə gətirib, açıq rəqabət aparmaqdan çəkindi. Çünki bilirdi ki, kifayət qədər səs toplamayacaq. Rüsvay olmamaq üçün əvvəlcədən dedi ki, mənə səs yollamayın. Belə də şey olar? Bu axı "Səs verməyin" formatında veriliş deyil. Burda tamaşaçılardan kömək istəmək və onlara etibar etmək lazımdır. Elçini camaat müğənni kimi yox, şadlıq sarayı sahibi kimi tanıyır. O, insanlar arasında sinfi fərq qoyur – bu kasıbdı, mən varlıyam və sairə. Belə şey etmək olmaz. Həyat elədir ki, biri varlı olanda biri kasıb olur. Burada qəbahət bir şey yoxdur. Lakin bunu dilə gətirmək böyük səhvdir. Etiraf edirəm ki, Aygün xanımla çox gözəl dostluq münasibətlərimiz var. O, mənim canımdı, ürəyimdi. Amma şəxsi münasibətləri başqaları kimi şouya daşımaq olmaz. Mən açıq mübarizə aparıram və televiziya tamaşaçılarına öz minnətdarlığımı bildirirəm ki, məni dəstəkləyib, arxamda dururlar".

Xatırladaq ki, dünən "Maşın şou"da Anar Ağakişiyev Elçinin onu çıxaracağını bildiyini deyərək, tamaşaçılardan "getsin"ə səs istəyib. Elçin Hüseynov isə səs istəməməsinə baxmayaraq, 62,76 faiz səs toplayıb. Istənilən iştirakçını yarışdan çıxarmaq fürsəti qazanan Elçin Hüseynov özü şoudan ayrılıb.