"Şeirlərimi öz adına çıxır".

Bu sözləri şair İlham Qəhrəman bədii qiraətçi Ağalar Bayramov haqqında Axar.az-a açıqlamasında deyib:

"Mayın 17-də ATV-də efirə gedən "Mənə bir az ondan danış" verilişində aktyor Ağalar Bayramov "Kim ölə, kim qala" şeirini Telli Borçalının şəninə öz adından deyib. Bu haqda Feysbukda status yazdım, Ağalar Bayramov xahiş elədi, statusu sildim. Sonra baxdım ki, veriliş Yutuba qoyulub. Verilişin 49-cu dəqiqəsində mənim şeirimi Ağalar Bayramov öz şeiri kimi ifa edir".

İlham Qəhrəman onu da qeyd edib ki, bu, ilk fakt deyil. Ağalar Bayramov bir neçə dəfə efirdə onun şeirlərinin möhürbəndində öz adını çəkib. Hətta buraxdırdığı diskdə də belə bir ifası var.

Qeyd edək ki, İlham Qəhrəman 1959-cu ildə Laçın rayonunun Sus kəndində anadan olub. Bir neçə şeir kitabının müəllifidir. Laçın folklorunu toplayaraq kitab kimi çap etdirib. Azərbaycan Yazıçılar Birliyinin üzvüdür.