Dünən Kapellhaus, Alman-Azərbaycan Mədəniyyət Birliyində alman rejissoru Andreas Dresenin filminin nümayişi olub.

Axar.az xəbər verir ki, məşhur rejissorun "Whisky mit Wodka" (Araqla viski - 2009) filminin nümayişindən əvvəl rejissor Elvin Adıgözəlin film barədə təqdimatı olub.

Filmin nümayişi "ALOV - Mədəni tədbirlər və rəssam rezidensiyaları layihəsi" çərçivəsində baş tutub.

Gürcüstanda yerləşən "Goethe-Institutun Film" arxivi tərəfindən təqdim edilən film haqqında Elvin Adıgözəl bunları deyib: "Həyatın içindəki insan tənhalıqlarını və münasibətlər fonunda eqoizmin dərəcələrini göstərən tragikomediya filmində möhtəşəm aktyor və aktrisa heyəti yer alıb. "Whisky mit Wodka" (Araqla viski) filmi bir kino truppasının həyatını və başlarına gələnləri satirik və bir qədər də melanxolik üslubla təqdim edir. Əslində, məşhur olan aktyorlar və məşhur olmayan xəyalpərəstlər bir-birindən həm fərqli, həm də bənzər yaşayışa sahibdirlər. Andreas Dresen festival filmi üslubunu saxlamasına baxmayaraq, eyni zamanda düşünən, zövqlü, fərqli tamaşaçıya xitab edən bir film çəkib. Sanki həyatda heç kim əslində lazım olan yerdə deyil".

Filmin nümayişinə giriş pulsuz olub. Nümayişdə sadə tamaşaçılarla yanaşı yerli aktyor və rejissorlar da iştirak edib.