IV Bakı Beynəlxalq Kitab Sərgi-Yarmarkasında iştirakla bağlı ərizə-müqavilə qəbuluna start verilib.

Mədəniyyət və Turizm nazirliyindən Axar.az-a verilən məlumata görə, bu ilin sentyabr ayının 16-18 tarixində IV Bakı Beynəlxalq Kitab Sərgi-Yarmarkası keçiriləcək. Tədbirin təşkilatçısı Azərbaycan Respublikası Mədəniyyət və Turizm Nazirliyidir.

Sərgidə iştirak edənlər sərgi-yarmarkada nəşriyyatları tərəfindən buraxılmış nəşrləri nümayiş etdirə, sata biləcək, iştirakçı xarici dövlətlərin nəşriyyatları, müəlliflər və milli nəşriyyat-poliqrafiya müəssisələri ilə danışıqlar apara, müqavilələr bağlamaq imkanı qazanacaqlar.

Xatırladaq ki, IV Bakı Beynəlxalq Kitab Sərgi-Yarmarkasında stend sahəsi (6 kv.m.-dək) və avadanlıqları iştirakçılara pulsuz olaraq veriləcək.

Sərgi-yarmarkada iştirak etmək üçün zəruri sənədləri (proqram, kataloq, iştirak şərtləri, ərizə-müqavilə) Təşkilat Komitəsindən əldə etmək mümkündür. ([email protected])

Yarmarkada iştirak haqqında ilkin məlumat 15 avqust 2015-ci il, ərizə-müqavilə isə 01 sentyabr 2015-ci il tarixinə qədər sərginin Təşkilat Komitəsinə təqdim edilməlidir.(Ünvan: AZ1000, Bakı ş., Ü.Hacıbəyli küç. 40, Hökumət Evi, 3-cü mərtəbə. Tel: 493-06-80. Faks: 493-56-05)