"Pyes bu mövsüm səhnələşdirilməyəcək".

Bu sözləri Gənc Tamaşaçılar Teatrının mətbuat xidmətinin rəhbəri Hüsniyyə Mursaquliyeva yazar Sevinc Elsevərin əsərinin səhnələşdirilməsi ilə bağlı Axar.az-a danışarkən deyib:

"Hazırda teatr mövsümünün yekunudur. Buna görə də Sevinc Elsevərin "Ürəyində arzu tut" pyesi bu mövsüm səhnələşdirilməyəcək. Sözügedən tamaşa teatrın repertuar planına salınıb və Mədəniyyət və Turizm Nazirliyi tərəfindən təsdiq olunub. Sentyabr ayında tamaşa üzərində işə başlanılacaq, bu da 88-ci teatr mövsümünün 4-cü rübünə təsadüf edir. Rejissor və aktyor heyəti haqda söz demək isə hələ tezdir".

Qeyd edək ki, yazar Sevinc Elsevərin "Ürəyində arzu tut" pyesi "Hədəf" Nəşrlər Evi və Gənc Tamaşaçılar Teatrının dəstəyi ilə keçirilən "Anamın kitabı" mükafatının pyes müsabiqəsində qalib olmuşdu və qaydalara görə qalib olan pyes səhnələşdirilməli idi.