Sülh və mədəniyyət arasında əlaqələri tapmalıyıq. Təxminən 50 ilə yaxındır ki, ömrümü münaqişə zonalarını çəkməklə keçirirəm. Bəzən məni müharibə fotoqrafı kimi təqdim edirlər. Amma mən daha çox sülh müxbiri kimi çıxış edirəm.

Kult.az xəbər verir ki, bu sözləri Rza Deqati “Mədəniyyət naminə sülh” qlobal kampaniyasının Tərəfdaşlıq Forumunda deyib.

“Biz yeni bir fazaya daxil olacağıq. Dünyanın yeni bəşəri dilə ehtiyacı var. Bu da fotoqrafiyadır. Foto dili hekayələri insanlara nəql edir.

İnsanlar bir-birini başa düşsə və sevsə, sülhə nail ola bilər. Təbii ki, bu mənada dil mühüm bir məqama çevrilir. Əgər biz sülhə nail olmaq istəyiriksə, uşaqlarımıza təhsil verməliyik. Əfsuslar olsun ki, bəzi ölkələrdə insanlar öz uşaqlarına müharibə aparmağı öyrədir.

Həm Birinci, həm də İkinci Qarabağ müharibəsini çəkmişəm. Xocalı soyqırımında çəkdiklərimi dünyaya yaymağa çalışmışam. İşğaldan azad olunmuş torpaqlarımıza gedəndə dəhşət içində idim.

Bu, bildiyimiz müharibə dağıntıları deyil, mədəniyyətin qəsdən dağıdılmasının təcəssümü idi”.