Toylar azalıb. Ayda 5-10 toy olur, çağırırlar, gedirik. Əlbəttə, əvvəllər olduğu kimi ayda 25 toya getmirəm. İndi heç elə müğənni də yoxdur. Ən populyar müğənnidən belə soruşanda deyir ki, 8-10 toya gedirəm. O vaxt şadlıq sarayı az idi.

Axar.az xəbər verir ki, bunu xalq artisti Səməd Səmədov deyib.

Müğənni 70 yaşı ərəfəsində baku.ws-ə geniş müsahibəsində qeyd edib ki, həmkarı Əli Mirəliyev haqlıdır:

"Hər yerdə deyir ki, ay camaat, inanım mənə, Səməd Səmədov oxuyan deyil, Səməd Səmədov ionika çalandır. Əli düz deyir. O vaxt həqiqətən də toylara çalğıçı kimi getmişəm.

Sonradan toylarda oxumağa başladım, get-gedə məşhurlaşdım. Əslində, elə də olmalıydı.

Çünki musiqiçi ailəsində böyümüşəm. Babam tar çalırdı, nənəm qarmonda ifa edirdi. Dayılarım, əmilərim musiqiçi idilər. Anam, atam Moskvada musiqi Konservatoriyasını bitiriblər. Atam skripka, anam piano üzrə bitirib".