Gənc aktyorlar Akademik Milli Dram Teatrının aktyoru, xalq artisti Ramiz Məliki məhkəməyə verməkdən imtina ediblər.

Bu barədə Axar.az-a ODA teatrının rəhbəri Elmin Bədəlov deyib.

Teatr rəhbərinin sözlərinə görə, R.Məliki məhkəməyə vermək əlavə vaxt itkisi olacaq:

"Ramiz Məlik sağ olsun, bizə mediada böhtan atandan sonra tamaşalarımız daha uğurla gedir və teatra üz tutan insanların sayı artıb. Bundan da əlavə, düşündük ki, Ramiz Məliklə məhkəmədə çəkişmək əlavə vaxt itkisi olacaq.

Vaxtımızı məhkəməyə sərf etməkdənsə yeni tamaşalar hazırlamaq qərarına gəldik. Hətta Ramiz Məlikin mediada bizə hücumlarından sonra sosial şəbəkələrdə ona qarşı tənqidi fikirlər səsləndi. Bu da göstərir ki, hər kəs doğrunu görə bilir".

Qeyd edək ki, bir müddət bundan öncə xalq artisti ODA teatrının ünvanına ağır ittihamlar səsləndirmiş, gənc aktyorları əxlaqsızlıqda günahlandırmışdı. Xalq artisti ODA teatrının tamaşalarının əxlaqsızlığı təbliğ etdiyini iddia etmişdi.