Müğənni Elvin Mirzəzadənin “Bu onun işidir” adlı oxuduğu və klip çəkdirdiyi mahnının sözləri oğurluq çıxıb.

Kult.az xəbər verir ki, bu barədə müğənninin özü məlumat paylaşıb. O bildirib ki, mahnı yayımlandıqdan sonra oğurluq olduğundan xəbər tutub:

“Feysbukda dostluğumda olan Adil Əmircan adlı biri mənə mesaj yazır ki, məndə yaxşı mahnı sözləri var, istəyirsiniz göndərim baxın, bəyənsəniz, qiymətdə razılaşaq, alın, bəstələyib, oxuyun.

Şeiri bəyəndim və dediyi qiymətə aldım. Mahnı dünən çıxır və bu gün məlum olur ki, “Bu onun işidir” şeirinin müəllifi başqa şəxsdir. Dostumuz Həsən Babayev mənə zəng edir ki, bu şeirin sözləri mənimdir və mən bunu 2017-ci ildə Feysbukda status kimi paylaşmışam. Yəni Adil Əmircan adlı biri başqasının şeirini mənə satmaqla yanaşı, bir istedadlı şair qardaşın haqqına girib”.

Məsələ ilə bağlı sözügedən şeirin müəllifi olduğunu iddia edən Həsən Babayev saytımıza açıqlamasında bildirib ki, Adil Əmircan adlı şəxs onun şeirini Feysbuk hesabından oğurlayıb:

“Mahnıya dünən qulaq asanda gördüm ki, sözləri mənə məxsusdur. 2017-ci ildə mən bu şeiri Feysbukda da paylaşmışdım. Əvvəllər daha çox şeir yazmaqla məşğul idim. Amma son illərdə bəstəkarlıq edirəm. Brilyant Dadaşova da daxil olmaqla mən bir çox müğənnilərə mahnı bəstələmişəm. Adil Əmircan yəqin ki, mənim şeirimi Feysbukdan götürüb. Klipdə də onun adı yazılıb və yenidən düzəliş edilməsi çətin məsələdir. Elvin dostumdur, onun da günahı yoxdur, aldadılıb sadəcə. Şeirlərimi müəllif hüquqlarında rəsmi olaraq təsdiqləməmişəm deyə, əlimdə sənəd də yoxdur ki, məhkəməyə müraciət edim. Birinci dəfədir bu halla rastlaşıram, hələlik məhkəməyə müraciət prosedurandan da xəbərsizəm”.