Sasseks hersoqu şahzadə Harri və həyat yoldaşı aktrisa Meqan Markl maliyyə böhranı və boşanma ərəfəsindədirlər.

Axar.az Qaynarinfo-ya istinadla xəbər verir ki, cütlük "Netflix"lə əməkdaşlığın dayandırılması səbəbilə həm maddi çətinlik, həm də münasibət böhranı yaşayır. Onlar hazırda "Netflix"də yayımlanan "With Love” adlı layihələrinə ümid bağlayıb. Lakin məlumata görə, "Netflix" bu layihəni davam etdirmək istəmir və yalnız ikinci mövsümə etikadan irəli gələn "jest” olaraq razılaşıb.

"Meqan və Harri bu müqaviləyə arxalanırlar - 29 milyon dollar dəyərindəki villalarını və böyük heyətlərini saxlamaq üçün. Əgər müqavilə yenilənməsə və xərclər azaldılmasa, onlar müflis ola bilərlər", - deyə mənbə bildirib.

Mənbələrə görə, cütlük efirdə səmimi görünmür, trendlərə uyğun davranmağa çalışır və bu da tamaşaçının onları qəbul etməməsinə səbəb olur. "With Love” şousu cəmi 5,3 milyon baxış toplayıb. Müqayisə üçün, "Netflix"in ən məşhur seriallarından biri olan "Pərəstiş dövrü” 140 milyon baxış həddini keçib. Harrinin polo və bağçılıq haqqında çəkdiyi sənədli film isə yalnız 500 min izləyici toplaya bilib.

Platforma nümayəndələrinin dediyinə görə, Meqan və Harrinin layihəsi parlaq, lakin darıxdırıcıdır. "Netflix" rəhbərliyi bu əməkdaşlığı "bədbəxt bir fəsil” kimi görür və onun sona çatmasını gözləyir.

Mənbələr qeyd edir ki, bu vəziyyət yalnız maliyyə deyil, həm də şəxsi münasibətləri gərginləşdirib. Boşanma ehtimalı yüksəkdir, cütlük hazırda özəl şəkildə münasibətlərini yenidən dəyərləndirir.