Azərbaycan Dövlət Pedaqoji Universitetində Musiqi, təsviri incəsənət, fiziki tərbiyə və çağırışaqədər hazırlıq fakültəsində professor Zemfira Abdullayevanın sinfinin konserti keçirilib.

Bu haqda Axar.az-a universitetin ictimaiyyətlə əlaqələr şöbəsindən məlumat verilib.

Məlumatda bildirilir ki, konsert zamanı ADPU-nun Tərbiyə işləri üzrə prorektoru, professor Fikrət Rzayev, Musiqi, təsviri incəsənət, fiziki tərbiyə və çağırışaqədər hazırlıq fakültəsinin dekanı, dosent Laçın Həsənova, Musiqi alətləri və onların tədrisi metodikası kafedrasının müdiri, professor Minarə Dadaşova, Təsviri incəsənət və onun tədrisi metodikası kafedrasının müdiri, dosent Çingiz Rüstəmov, fakültənin professor-müəllim heyəti və tələbə-gəncləri iştirak edib.

III, IV tədris ilinin tələbələri Altay Vəlizadə, Elşanə Müslümzadə, Aydan Quluzadə, Fidan Abbaslı, Məhərrəməli Alışanov, Azərbaycan Beynəlxalq müsabiqə laureatı Lalə Ağayeva dünya və Azərbaycan musiqisi klassiklərinin əsərlərini səsləndirib.