Azərbaycanın caz ustadları İsfar Sarabski&trio və Şəhriyar İmanov Braziliyaya 22 avqust tarixindən başlanan turnenin davamı olaraq Rio-de-Janeyro şəhərinin məşhur Blue Note konsert zalında sonuncu konsertlərini veriblər.

Azərbaycanın Braziliyadakı səfirliyindən Kult.az-a daxil olan məlumatda bildirilir ki, Rio-de-Janeyrodakı konsert San Pauloda keçirilmiş üç konsert və bir ustad dərsi kimi yerli auditoriya tərəfində çox böyük maraqla qarşılanıb.

Konsertə Rio-de-Janeyro şəhər meriyasının nümayəndələri, burada yerləşən Azərbaycan bələdiyyə məktəbinin müəllim və şagirdləri, həmçinin yerli caz həvəskarları qatılıblar. Tədbir yerli mətbuat tərəfindən geniş işıqlandırılıb.

Qeyd edək ki, Azərbaycanın Braziliyadakı səfirliyinin təşkilatçılığı və dəstəyi ilə həyata keçirilən Azərbaycan ustadlarının Braziliya turnesi 21-31 avqust tarixlərində həyata keçirilib və Azərbaycan Cümhuriyyətinin 100 illik yubileyinə həsr edilib. Keçirilmiş konsertlər yerli SESC TV kanalı tərəfindən lentə alınaraq ölkənin müxtəlif televiziya və radiolarında il boyu yayımlanacaq. Həmçinin konsertlər albom şəkilində dünya miqyaslı digital platformalarda yerləşdiriləcək.