Azərbaycan Dövlət Musiqili Teatrının gənc aktrisası Aydan Həsənova beynəlxalq müsabiqədə ölkəmizi təmsil edəcək.

Teatrdan Axar.az-a verilən məlumata görə, Aydan Həsənova may ayında Yekaterinburqda keçiriləcək SSRİ xalq artisti Vladimir Kuroçkin adına "Gənc Operetta və Müzikl Artistlərinin VI Beynəlxalq Müsabiqəsi"ndə iştirak edəcək.

O, bu mötəbər tədbirdə Azərbaycan Respublikasının Mədəniyyət və Turizm Nazirliyinin maddi dəstəyi ilə yer alacaq.

Qeyd edək ki, müsabiqə 2016-cı il 16-21 may tarixlərində Rusiya Federasiyasının Yekaterinburq şəhərində Sverdlovsk Dövlət Akademik Musiqili Komediya Teatrında keçiriləcək. Aydan Həsənova müsabiqədə Ü.Hacıbəylinin "Arşın mal alan" operettasından Gülçöhrənin ariyasını, İ.Dunayevskinin "Azad külək" operettasından Pepitanın mahnısını və F.Leqarın "Sirkin şahzadəsi" operettasından Teadoranın ariyasını ifa edəcək.