Mayın 10-da Stokholmda keçirilən Avroviziya-2016 mahnı müsabiqəsinin 1-ci yarımfinal mərhələsi keçirildi. Tədbir Azərbaycan və Ermənistan arasında baş verən qalmaqalın kölgəsində qaldı.

Axar.az xəbər verir ki, bu fikirlər Ukraynanın Dialog.ua saytının yayımladığı məqalədə yer alıb.

Sayt yazıb ki, İveta Mukuçyan nəinki favoritlərin ilk beşliyinə düşə bilməyib, həm də yayımın sonunda qalmaqallı addım atıb.

"Müğənni səhnəyə nümayişi qadağan edilən "Dağlıq Qarabağ"ın bayrağını gətirdi və nəticələrin elan olunduğu an jurnalistlərin gözü qarşısında nümayiş etdirdi. Müsabiqənin təşkilatçıları erməninin belə addımından şoka düşmüşdülər. Mukuçyan bildirib ki, Almaniyada yaşasa da, vətənpərvər olaraq qalır, buna görə də öz doğma ölkəsində baş verən münaqişəyə diqqət çəkmək istəyib. Azərbaycan nümayəndə heyəti Mukuçyanın hərəkətinə etiraz etdi və Avroviziya-2016-nın təşkilatçılarına narazılığını çatdırdı. Səmra Rəhimli isə bildirdi ki, o, mahnı müsabiqəsinə gəlib. Onun bu sözləri zaldakılar tərəfindən böyük alqışlarla qarşılandı. Azərbaycanlı müğənni jurnalistlərə açıqlamasında Ukraynadakı qohumlarında tez-tez olduğunu deyib və ukraynalı iştirakçı Camalənin ilahi səsə malik olduğunu bildirib", - məqalədə bildirilib.

Sayt yazıb ki, bu qalmaqaldan sonra sosial şəbəkələrdə əsl gərginlik yaşanıb:

"Müxtəlif ölkələrin sakinləri kimin haqlı olduğunu müzakirə etdilər. Müzakirələrdə həm də Azərbaycan və Ermənistan nümayəndələrinin gözəlliyi və istedadı da müzakirə edildi. Ukraynalılar bu polemikada birmənalı mövqe seçdilər: Azərbaycandan olan incə və nəfis Səmra mübahisəsiz olaraq gözəl kimi tanındı, aqressiv erotizmi belə İveta Mukuçyana kömək edə bilmədi. Yeri gəlmişkən, ukraynalıların fikrincə, Səmranın ifa etdiyi "Miracle" mahnısı da erməni müğənninin "LoveWave" kompozisiyasından daha güclü idi.

- Səmra çiçək kimi incədir. İveta aqressiv gözəlçədir. Məhz incəlik könülləri fəth edir, nəinki təcavüzkarlıq.

- Mübahisəsiz olaraq Azərbaycan gözəlliyi və istedadı ilə irəlidədir.

- Ukrayna Səmranı dəstəkləyir, - istifadəçilər yazıb".