Avqustun 11-də rus qoşunları Donetsk vilayətində Ukrayna müdafiəsini yarıb və ən azı altı mil əraziyə doğru irəliləmişdi. Bu, son aylarda strateji əhəmiyyətli Konstantinovka və Pokrovsk şəhərlərində mümkün irəliləyişlə bağlı narahatlıqları artıran ən dərin hücumlardan biri idi. Lakin Ukrayna ordusu rusların planlarını pozdu.

Axar.az xəbər verir ki, bu barədə “Telegraf” nəşri məlumat yayıb.

Nəşrin məlumatna görə, artıq avqustun 12-dən etibarən “Azov” korpusu əks-hücumlara başladı:

“Hücumdan bir neçə gün sonra rus əsgərləri Ukraynanın elit bölmələrindən biri olan “Azov” korpusu tərəfindən mühasirəyə alındı. Avqustun 14-də vəziyyət sabitləşdi və ələ keçirilən kəndlər azad edildi. Moskvanın niyyəti şərqdə Ukrayna qoşunlarını təchizatı üçün əsas arteriya olan Dobropolye-Kramatorsk magistralına nəzarəti bərqərar etmək idi. Lakin “Azov”un çevik reaksiyası sayəsində bu strateji yol Kiyevin nəzarətində qaldı”.

“Azov”un tərkibində döyüşmüş keçmiş britaniyalı dəniz piyadası Şon Pinner nəşrə açıqlamasında rusların taktikasını intihar missiyası adlandırıb.