Ukraynada ölkəni tərk etmək istəyən 18-22 yaş arası kişilərdən hərbi qeydiyyat sənədi tələb olunacaq.

Axar.az Oxu.az-a istinadla xəbər verir ki, bu barədə "Rada" telekanalının efirində Ukrayna Dövlət Sərhəd Xidmətinin nümayəndəsi Andrey Demçenko bildirib.

Demçenko əlavə edib ki, Sərhəd Xidməti ölkə vətəndaşlarına bütün detalları izah etmək üçün hökumət fərmanının dərcini gözləyir.

Bir gün əvvəl Ukrayna Prezidenti Vladimir Zelenski hökumətin avqustun 26-da 18-22 yaş arası kişilər üçün xaricə səyahət qaydalarını yeniləyəcəyini bildirmişdi.

Bundan əvvəl Ukrayna Ali Radasına 24 yaşına çatmamış kişilərin xaricə getməsinə icazə verilməsinə dair qanun layihəsi təqdim edilmişdi. Eyni zamanda, Zelenski hökumətə 22 yaşdan kiçik ukraynalı gənclərin dövlət sərhədini keçməsini sadələşdirməyi təklif edib.