Ukrayna Hərbi Sənaye Kompleksinin yeni uzaqmənzilli raketlərin (“Flaminqo” və “Uzun Neptun”) kütləvi istehsalına başlaması və istehsal güclərini davamlı artırması çox ciddi uğurdur. Lakin burada nəzərə alınmalı bir neçə vacib nüans var.

Axar.az xəbər verir ki, bu barədə politoloq Kamran Cəfərov qeyd edib.

Ekspertin sözlərinə görə, Ukraynanın uzaqmənzilli ağır raketlərin istehsalına başlaması müharibənin gedişatına ciddi təsir göstərə bilər:

“Amma bəzi önəmli məqamlar xüsusi diqqət tələb edir. Hazırda gündə 1 ədəd “Flaminqo” raketi istehsal olunur, lakin istehsal gücü fasiləsiz artırılır. Plana görə, ilin sonuna qədər aylıq istehsal həcmi 200 raketə çatdırılacaq.

Lakin bu mərhələdə Ukrayna Silahlı Qüvvələri bu raketlərdən istifadə etməməlidir. Çünki bu tip raketlərin tətbiqi yeni kütləvi zərbə taktikasının hazırlanmasını tələb edir. Burada bir çox faktorlar nəzərə alınmalıdır: zərbə dalğalarının sayı, raketlərin və dronların kombinasiyası, yalançı dronların istifadəsi, trayektoriyalar, manevrlər və s. Hazırda Ukraynada bu raketlərin sayı kütləvi zərbələr üçün kifayət deyil və 50-100 raketin atılması üçün yeni taktikanı ifşa etmək məqsədəuyğun sayılmaz.

Buna görə də indiki mərhələdə Ukraynanın qarşısında iki əsas məqsəd var:

1. Uzaqmənzilli raketləri sürətlə istehsal edib, onları maksimum gizlətmək;

2. Rusiyanın hava hücumundan müdafiə (HHM) sistemlərini maksimum dərəcədə sıradan çıxarmaq.

Birinci məqam aydındır. İkincisinə gəldikdə isə son günlər Ukrayna Təhlükəsizlik Xidmətinin sıradan çıxardığı Rusiyaya məxsus HHM, REB və RLS avadanlıqlarının siyahısı kifayət qədər təsirli görünür:

- 4 ədəd ZRK TOR-M2

- 3 ədəd ZQRK “Pantsir”

- 2 ədəd ZRK S-300

- 1 ədəd ZRK BUK-M3

- 1 ədəd radar 50N6 S-350

- 1 ədəd RLS Kasta-2E2

- 1 ədəd RLS “Podlyot”

- 1 ədəd REB “Jitel”

- 1 ədəd RLS Nebo-SVU

- 1 ədəd RLK 55J6M Nebo-M

Başqa sözlə, Ukrayna Rusiyanın HHM şəbəkəsini zəiflətmək istiqamətində ciddi işlər görür.

Son günlər biz Rusiya neft emalı zavodlarına (NEZ) qarşı zərbələrin artdığını müşahidə edirik. Zərbələrin əksəriyyəti dronlar vasitəsilə həyata keçirilir. Təsəvvür edin ki, cəmi 60-100 kq partlayıcı daşıyan dronlar belə bir neçə NEZ-i uzunmüddətli sıradan çıxara bilirsə, eyni obyektə 3, 4 və ya 5 ədəd “Flaminqo” raketi, hər biri 1150 kq partlayıcı maddə ilə düşsə, nə baş verər?

Bu səbəbdən Ukrayna indi bu ağır raketləri istehsal edib ehtiyatda saxlamalıdır. Çünki bir neçə aydan sonra Rusiyanın enerji infrastrukturuna “cəhənnəm günləri” yaşatmaq üçün kifayət qədər arsenal yığmaq strateji baxımdan həyati əhəmiyyət daşıyır”.