Suriyada davamlı regional sülh və sabitlik baxımından tarixi fürsətlər yaradan yeni bir dövrün qapıları açılıb. Suriyanın ərazi bütövlüyü və siyasi birliyi qorunmaqla yenidən dirçəlməsinə verəcəyimiz dəstək bütün bölgəmizin xeyrinə olacaq.

Axar.az xəbər verir ki, bu sözləri Türkiyə Prezidenti Rəcəb Tayyib Ərdoğan Çinin Tiencin şəhərində "ŞƏT plyus" formatında keçirilən görüş zamanı deyib.

“Qonşumuz Suriyanın təhlükəsizliyini və ərazi bütövlüyünü təhdid edən hər cür təşəbbüsə qarşı çıxmaqda davam edəcəyik.

Cənubi Qafqazda və Orta Asiyada davamlı sülh, sabitlik və rifahın təmin olunması üçün son dövrdə atılan addımlar məmnunluq doğurur.

Bu addımların humanitar, iqtisadi və ticarət əlaqələrinin inkişafına, nəqliyyat və kommunikasiya xətlərinin açılmasına töhfə verəcəyinə ümid edirik. Orta Asiyadakı qardaş ölkələrlə ikitərəfli və çoxtərəfli platformalarda yaxın əməkdaşlığımız hər keçən gün daha da inkişaf edir. Türk Dövlətləri Təşkilatı çərçivəsində atdığımız addımlar təkcə qardaş ölkələrimiz üçün deyil, həm də geniş bölgəmizin sabitliyinə töhfə verir”, - Ərdoğan bildirib.