Ukrayna kəşfiyyatı Vladivostokda hərbi cinayətlərdə iştirak etdiyi iddia edilən hərbçiləri məhv edib.

Axar.az xəbər verir ki, bu barədə Ukrayna mətbuatı məlumat yayıb.

Məlumata görə, Kiyev, Uqledar, Mariupol, Kursk və Pokrovsk istiqamətlərində hərbi əməliyyatlarda iştirak edən 155-ci əlahiddə desant-hücum briqadasının 47-ci əlahiddə desant-hücum batalyonunun yerləşdiyi Şitovaya kəndi ərazisindəki hərbi hissənin yaxınlığında bu gün səhər partlayışlar baş verib.

Xeyli sayda ölən və yaralananların olduğu bildirilsə də, say barədə məlumat verilməyib.

Hadisə yerinə xüsusi xidmət orqanlarının çoxlu sayda texnikası və əməkdaşı cəlb olunub. Ərazidə nəqliyyatın hərəkəti məhdudlaşdırılıb. Hüquq-mühafizə orqanları ərazidən keçən bütün avtomobilləri yoxlayır.

Qeyd olunub ki, Rusiya hökuməti hadisəni qaz sızmasından baş verən partlayış kimi təqdim edib.