ABŞ və Çin arasındakı ticarət qarşıdurması növbəti mərhələyə daxil olur.

Axar.az xəbər verir ki, bu barədə “Blumberq” agentliyi məlumat yayıb.

Agentlik qeyd edir ki, əvvəllər Trampın tətbiq etdiyi rüsumlardan narazı olan dünya liderləri, indi Çinin nadir torpaq metallarına dair sərt siyasəti səbəbindən onun ətrafında birləşməyə başlayıblar:

“ABŞ Prezidenti Donald Trampın tarif müharibəsi müttəfiqləri özündən uzaqlaşdırmış və Çinə dünyanı öz təsiri altına almaq imkanı vermişdi. İndi isə Pekinin sərt taktikasına qarşı qlobal müqavimət formalaşır — görünür, vəziyyətin istiqaməti dəyişməyə başlayıb.

Si Szinpinin nadir torpaq metalları ixracına sərt nəzarət tətbiq etmək qərarı narazılıq yaradıb. ABŞ və digər ölkələr cavab addımları hazırlayır. Çin bu faydalı qazıntıların dünya ehtiyatlarının demək olar ki, yarısına sahibdir.

Gərginlik artır, çünki Szinpin və Tramp altı ildən sonra ilk görüşlərinə hazırlaşırlar. Hər iki tərəfdən danışıqlar aparan nümayəndə heyətləri gələn həftə toplanaraq yaranmış vəziyyətdən çıxış yolu tapmağa çalışacaqlar”.