Kremlin ABŞ Prezidenti Donald Trampın döyüş əməliyyatlarını dayandırmaq çağırışına baxmayaraq, bunu etməkdə maraqlı deyil, çünki Rusiya qoşunları Ukraynada cəbhə xəttinin bir neçə istiqamətində irəliləyir.

Axar.az xəbər verir ki, bu barədə CNN nəşri yazıb.

Qeyd olunur ki, Rusiya ordusu xüsusilə güclü hava bombardmanlarının hesabına uğur qazanır. Məsələn, təkcə cümə günü rekord sayda — 268 idarəolunan aviasiya bombası istifadə edilib. Müqayisə üçün, son həftələrdə bu göstərici gündəlik orta hesabla 170–180 arasında olub.

Bundan əlavə, Rusiya hər gecə bütün Ukrayna ərazisinə pilotsuz uçuş aparatları (PUA) və raketlərlə zərbələr endirir, əsasən enerji infrastrukturu obyektlərini hədəfə alır. Sentyabr ayında işğalçılar sutkada orta hesabla 180-dən çox PUA buraxıblar ki, bu da ilin əvvəlindəki göstəricidən 2 dəfədən çoxdur.

Beləliklə, analitiklərin fikrincə, Kremlin kompromisə getməsi üçün heç bir stimulu yoxdur.

“Moskva dronlardan istifadə üçün yeni üsullar işləyib hazırlayıb. Bu üsullar Ukrayna hərbçilərini aşkar etmək və məhv etməyə, həmçinin Ukrayna obyektlərini dağıtmağa imkan verir. Beləcə, əvvəllər zəif nöqtəsi sayılan sahə indi onun üstünlüyünə çevrilib,” – deyə analitik Dara Massikot yazıb.