Rus əsgərləri Donetsk vilayətinin Torskoye qəsəbəsi yaxınlığında irəliləyiblər, hətta Liman istiqamətində, eləcə də Zareçnoye rayonunda “boz zona”nı genişləndiriblər.

Axar.az xəbər verir ki, bu barədə “DeepState” layihəsi məlumat yayıb.

Məqalədə qeyd edilib ki, Rusiya Yampola edilən uğursuz hücumlardan sonra ordunu Limana qədər olan meşəlik ərazilərə toplayıb. Belə ki, ruslar Yampola qərb tərəfdən yaxınlaşmağa başlayıblar. Onlar meşələrdə gizlənərək kəndə daxil olmaq üçün yollar axtarırlar. Bu cəhdlər hələ də davam edir. Bəzən bir neçə nəfər kəndə daxil ola bilir, amma çox vaxt oradaca ölürlər.

Ekspertlər isə bildirir ki, son günlərdə ruslar sızmağa çalışdıqları ərazilərin miqyasını genişləndiriblər. Artıq bir neçə dəfə Liman şəhərinin kənarına qədər irəliləyiblər. Onlar adətən gecə vaxtı kiçik piyada qruplarla əraziyə sızmağa çalışırlar. Məqsədiləri isə əvvəlcə sağ qalmaq və digər qrupların gəlməsini gözləyərək toplaşmaqdır.

Buna baxmayaraq, Ukraynanın Müdafiə Qüvvələri əraziyə davamlı nəzarət edir və PUA-lar onları vaxtında aşkarlayıb, müəyyən yerlərdə toplanmasının qarşısını alır.