Zaporoje vilayətində vəziyyətin sabitləşməsi Ukrayna ordusunu gücləndirmək üçün əlavə resursların olub-olmamasından asılı olacaq.

Axar.az xəbər verir ki, bunu ukraynalı hərbi ekspert Vladislav Seleznyev bildirib.

“Novouspenovskoye, Novoye, Oxotniçye, Uspenkovka, Novonikolayevka düşmənin nəzarətinə keçib. Biz manevrli müdafiə aparmağa və başqa cəbhə xətlərinə, mövqelərə geri çəkilməyə məcbur olduq. Qulyaypol üçün risklər artır”, - deyə Seleznyev qeyd edib.

O xatırladıb ki, rus hərbçiləri bu istiqamətdə səylərini əhəmiyyətli dərəcədə artırıblar, lakin bəzi ukraynalı şəxslərdən vəziyyətin sabit olduğu və Ukrayna qüvvələrinin effektiv əks-hücum tədbirləri apardığı barədə qəribə bəyanatlar eşidilib:

“Göründüyü kimi, bu tədbirlər kömək etmədi. Biz torpaqlar itiririk. Düşmən güc toplayır və kifayət qədər genişmiqyaslı hücum edir. Yəni biz gündə bir neçə kvadrat kilometr ərazi itiririk və əlbəttə, bu, Qulyaypolu təhlükə altına qoyur”.