Hava və quru yollarının bağlanması, eləcə də SEPAH-ın Qüds Qüvvələrinin yüksək rütbəli komandirlərinin öldürülməsi fonunda İran və Hizbullah maliyyə və silah ötürülməsi üçün yeni şəbəkə yaradıb.

Axar.az xəbər verir ki, bu barədə İsrailin “Ynet” portalı məlumat verib.

Məlumata görə, SEPAH son bir ildə Hizbullaha silah və yüz milyonlarla dollar çatdırmaq üçün alternativ gizli yollar tapıb.

Bildirilir ki, Hizbullaha yardımlar kommersiya yükü adı altında dəniz daşımaları, həmçinin birjalar, qızıl ticarəti və kriptovalyutalar vasitəsilə edilir.

ABŞ Maliyyə Nazirliyi İranın İsraillə müharibədən sonra ilin əvvəlindən Hizbullaha təxminən 1 milyard dollar köçürdüyünü qeyd edib.