Rusiya və ABŞ tərəfindən təklif olunan “sülh sazişinin” yeni versiyası çərçivəsində Zaporojye və Xerson istiqamətindəki cəbhə xətti dondurulacaq, lakin bəzi ərazilər Rusiya tərəfindən Ukraynaya qaytarılacaq. Bununla yanaşı, ABŞ Krım və Donbası rəsmi şəkildə Rusiyanın bir hissəsi kimi tanıyacaq.

Axar.az xəbər verir ki, bu barədə “Axios” məlumatlı amerikalı rəsmiyə istinadən yazıb.

Məlumata görə, Kiyevdən Donbasın qalan hissəsindən imtina etməyi tələb edərkən, Ağ Ev belə düşünür ki, müharibə davam edərsə, Ukrayna onsuz da bu ərazini itirəcək. Ona görə də Ukraynanın maraqlarına uyğun olan hazırda razılaşmaya nail olmaqdır.

Bildirilir ki, sülh planına əsasən, Donbas əraziləri Rusiyanın nəzarəti altında olsa da, onları demilitarizasiya zonası elan edəcəklər və Rusiya orada qoşun yerləşdirə bilməyəcək:

“Putinin Rusiya konstitusiyasına daxil etdiyi Xerson və Zaporojye vilayətlərinə gəldikdə isə, oradakı nəzarət xətləri “dondurulacaq”.

Həmçinin bildirilir ki, Rusiya danışıqlar keçirilməsi şərtilə bəzi ərazilərə nəzarəti Ukraynaya qaytaracaq. Lakin məsələnin konkret hansı ərazilərdən getdiyi dəqiqləşdirilməyib.

Qeyd olunur ki, Rusiya hazırda Dnepropetrovsk, Xarkov və Sum vilayətlərinin bəzi hissələrinə nəzarət edir və Kreml bu ərazilərə rəsmi olaraq iddia irəli sürməyib.

Plana əsasən, ABŞ və digər ölkələr Krım və Donbası Rusiyanın suveren ərazisi kimi tanıyacaqlar, lakin Ukraynadan bunu tələb etməyəcəklər.