Moskva vilayətində qaz kəmərinə qarşı planlaşdırılan təxribatın qarşısı alınıb. Hadisə ilə bağlı Rusiya vətəndaşı saxlanılıb.

Axar.az xəbər verir ki, bu barədə Rusiya Federal Təhlükəsizlik Xidməti (FTX) məlumat yayıb.

Məlumata görə, hadisə Serpuxov rayonu ərazisində baş verib. Belə ki, qaz kəmərinə özəl hazırlanmış partlayıcı qurğunun quraşdırılması zamanı Rusiya vətəndaşı cinayət başında yaxalanıb.

Qurumun açıqlamasında qeyd olunur ki, saxlanılan şəxs 2024-cü ildə Ukrayna ərazisində miqrasiya qaydalarını pozduğuna görə əcnəbilərin müvəqqəti saxlanma mərkəzində olarkən Ukrayna xüsusi xidmət orqanları tərəfindən ələ alınıb. Onun sonradan “deportasiya” bəhanəsi ilə Rusiyaya göndərildiyi və əsas məqsədinin qaz kəmərində diversiya törətmək olduğu bildirilir.