Türkiyənin kənd təsərrüfatı və meşə təsərrüfatı naziri İbrahim Yumaklı Ermənistanın iqtisadiyyat naziri Gevorq Papoyanla İstanbulda görüşüb.

Axar.az xəbər verir ki, bu barədə Ermənistan mediası məlumat yayıb.

Papoyan bildirib ki, Ermənistan-Türkiyə arasında müntəzəm təmasların vacibliyini vurğuladıq və dialoqu davam etdirməyə hazır olduğumuzu bir daha təsdiqlədik.

Öz növbəsində türkiyəli nazir Ermənistanın Baş naziri Nikol Paşinyanın Türkiyəyə son səfərini yüksək qiymətləndirib və bunun ikitərəfli münasibətlərin inkişafına müsbət təsirini vurğulayıb.

Qeyd edilib ki, görüşdə Qars-Gümrü dəmir yolu xəttinin yenidən açılması imkanları, TRİPP proqramı vasitəsilə hər iki ölkə üçün yaranan yeni iqtisadi, logistik və ticarət fürsəti müzakirə edilib. Söhbət zamanı bazarların şaxələndirilməsi, yeni logistik marşrutların formalaşdırılması, qarşılıqlı iqtisadi maraqların genişləndirilməsi məsələsi də diqqət mərkəzində olub.

O cümlədən kənd təsərrüfatı sahəsində əməkdaşlıqla bağlı məsələlər də müzakirə edilib.

Görüşdə Ermənistanın QDİƏT-dəki daimi nümayəndəsi Nairi Petrosyan da iştirak edib.