Dekabrın 15-də Novorossiysk limanında sualtı qayığa hücumdan əvvəl Ukrayna Təhlükəsizlik Xidməti əməliyyata müdaxilə edə biləcək İl-38N dəniz kəşfiyyat təyyarəsini vurub.

Axar.az xəbər verir ki, bu barədə Ukrayna Təhlükəsizlik Xidməti (UTX) məlumat yayıb.

Bildirilib ki, bu xüsusi əməliyyatın əsas mərhələlərindən biri Rusiya sualtı qayıq əleyhinə təyyarəsinin sıradan çıxarılması olub:

“Yeysk aviabazasında məhv edilən modernləşdirilmiş İl-38N kəşfiyyat təyyarəsi dəniz kəşfiyyatı, sualtı qayıqların aşkarlanması, minalama və torpedo zərbələri üçün nəzərdə tutulub. Zədələnmiş təyyarə UTX-nin dəniz dronlarına aktiv şəkildə müdaxilə edib”.

Qeyd edək ki, dekabrın 15-də Ukrayna Təhlükəsizlik Xidməti (UTX) unikal xüsusi əməliyyat həyata keçirərək Novorossiysk limanında Rusiya donanmasına məxsus “Varşavyanka” sinifli sualtı gəmini partladıb.