1999-cu ilin 21 martında ABŞ-a "yaşıl pasport"la getdiyini araşdırıb üzə çıxaran Türkiyənin "Sabah" qəzeti Gülənin moizəçilikdən istefa ərizəsini də əldə edib.

"Axar.az" xəbər verir ki, Türkiyə mətbuatı 1999-cu ildə haqqında açılan istintaqdan dərhal sonra müalicə almaq səbəbiylə ABŞ-a gedən Gülənin ölkədən "yaşıl pasport"la çıxdığı haqqında xəbərlər yaymışdı. 1981-ci ildə səhhəti üzündən istefa verən orta məktəb məzunu, kiçik vəzifəli məmur olan Gülənin "yaşıl pasport"a necə sahib olduğu hamıya maraqlıdır.

Vəkili cavabsız qoyub

Gülənin vəkili Nurullah Albayraq açıqlama verərək "yaşıl pasport"un Pasport Qanununa əsasən alındığını deyib. Albayraq istefa verən bir məmurun necə "yaşıl pasport" ala bildiyi barədə isə açıqlama verməyib.

1981-ci il martın 24-də Gülən ürək narahatlığı səbəbi ilə Çanaqqala Müftiliyinə istefa ərizəsi verib. Gülənin 1981-ci ilin 16 aprelində ikinci dəfə istefa barədə yazdığı ərizə də üzə çıxıb. İstefa verən bir məmurun illər sonra necə "yaşıl pasport" aldığı isə qaranlıq qalıb.