ABŞ mediasının başı prezidentliyə namizədlər Donald Tramp və Hillari Klintona qarışdığı bir vaxtda Avropa Birliyi vahid ordu yaradır.

Axar.az xəbər verir ki, bu barədə ABŞ-ın nüfuzlu "Nyusvik" dərgisində yazılıb.

Macarıstan və Çexiyanın belə bir təklif səsləndirdiyini xatırladan qəzet Obama administrasiyasının uzun illər əvvəl "Avropanı qorumaq" siyasətindən əl çəkməli olduğunu qeyd edib:

"Bu, çox ciddi bir münasibət dəyişikliyidir. İndiyədək Avropa ölkələri təhlükəsizlik məsələlərini NATO vasitəsilə həll ediblər, Birlik diqqətini daha çox iqtisadi məsələlərə yönəldib. Həm də NATO-ya dəstək Vaşinqtonun arzularını əks etdirirdi, ABŞ-ın Trans-Atlantik təhlükəsizlik qərarlarına nəzarətini təmin edirdi. Bu nəzarətin də bədəli kiçik olmayıb, Avropa müttəfiqləri Vaşinqtonun təhlükəsizlik sahəsindəki nüfuzundan geninə-boluna istifadə ediblər.

ABŞ liderləri dəfələrlə Avropa ölkələrinin təhlükəsizlik təşəbbüslərini əngəlləyib. Soyuq müharibə bitincə, bu siyasətin dəyişilməsi, təhlükəsizlik yükünün atılmasına əla fürsət yarandı. Yuqoslaviya 1990-cı illərdə parçalanmağa başladı. O zaman Avropanın ilkin diplomatik və sülhyaratma cəhdləri alınmayanda, müttəfiqlər ABŞ-dan liderlik tələb etdilər. O vaxt Klinton administrasiyası buna qətiyyətlə "yox" deməliydi.

ABŞ rəsmiləri o zaman avropalı həmkarlarına deməliydilər ki, Balkanlarda qarışıqlıq regional məsələdir və Birləşmiş Ştatlara elə də təsiri yoxdur. Necə ki, biz onlardan Mərkəzi Amerika və yaxud Karib adalarında hansısa itaətsizliyin yatırılmasında aparıcı rol gözləmirik, onlar da ABŞ ordusunun Balkanlara gələcəyini gözləməsinlər. Bu halda avropalılar regiondakı təhlükəsizlik məsələləri barədə özləri düşünərdilər, nəinki asılı duruma düşərdilər. Amma Vaşinqton NATO vasitəsi ilə Balkanlarda dominant rolunu saxladı, 1995-ci ildə Bosniyaya, 1999-cu ildə Kosovoya müdaxilə etdi".

Avropanın təhlükəsizlik sahəsində ABŞ-dan asılı qaldığı yazılan məqalədə NATO-nun Mərkəzi, daha sonra Şərqi Avropaya doğru genişləndikcə, Vaşinqtonun daha çox risklə üzləşdiyi qeyd edilib:

"Amma yenə də amerikalı siyasətçilər bundan dərs almadılar. Onlar hələ də NATO-nun avropalı üzvlərini inandırırlar. Sanki köməksiz protektoratdırlar və müttəfiq olmaqla ABŞ-a böyük xeyir verirlər.

Əslində, AB köməksiz durumda deyil. Əhalisi və iqtisadiyyatı ABŞ-dan böyükdür. AB ona görə müdafiə tərəfini inkişaf etdirə bilməyib ki, Birləşmiş Ştatlar belə bir məsuliyyətsiz davranışa şərait yaradıb.

Macarıstan və Çexiya Respublikasının AB-nin öz hərbi qüvvəsini yaratmasını istəməsi sağlam fikirdir. Bu dəfə Vaşinqton belə bir təşəbbüsü boğmağa çalışmamalıdır. Avropa ölkələrinin 8 min kilometr uzaqda yerləşən ABŞ-ın hərəkətə keçməsini gözləməkdənsə, regiondakı təhlükəsizlik problemlərini özlərinin həll etməsi daha ağlabatandır".