İran iyulun əvvəlinə qədər Hörmüz boğazındakı blokadanı aradan qaldırmasa, kommersiya gəmilərinin keçidini təmin etmək üçün xüsusi missiyanın başladılması ehtimalı NATO-da müzakirə olunur.

Axar.az xəbər verir ki, bu barədə “Blumberq” agentliyi Alyansdakı mənbələrə istinadən məlumat yayıb.

Agentliyin həmsöhbətlərinin sözlərinə görə, ideya artıq NATO-ya üzv bir neçə ölkə tərəfindən dəstəklənir, lakin hələlik ümumi razılıq yoxdur. Yekun qərarın 7–8 iyul tarixlərində Ankarada keçiriləcək alyans sammitində veriləcəyi gözlənilir.

NATO-nun Avropadakı birgə qüvvələrinin baş komandanı Aleksus Qrinkeviç belə bir ssenarinin nəzərdən keçirildiyini təsdiqləyib:

“Əvvəlcə siyasi qərar qəbul edilməlidir, sonra isə rəsmi planlaşdırma aparılmalıdır. Mən bu barədə düşünürəmmi? Əlbəttə”.

Eyni zamanda NATO-da etiraf edirlər ki, təhlükəsiz gəmiçiliyə zəmanət vermək çətin olacaq. Hətta ABŞ-ın regionda gəmilərin keçidini təmin etmək üçün əvvəlki cəhdi də qısamüddətli olmuşdu.