Yenidən CHP sədri olan Kamal Kılıçdaroğlunun keçmiş mətbuat katibi Nuray Başaran qatıldığı canlı yayımda sabiq sədr Özgür Özəl haqqında sensasion iddialar irəli sürüb.

Axar.az xəbər verir ki, bu barədə Türkiyə mediası məlumat yayıb.

Başaran bildirib ki, 4-5 noyabr 2023-cü il tarixlərində keçirilən CHP-nin 38-ci fövqəladə qurultayındakı qanun pozuntuları ittihamları ilə bağlı hesabatlar tamamlanıb.

İddialara görə, partiya qurultayı zamanı və sonrasında xərclənən vəsaitlər Kipr üzərindən 143 fərqli şirkət vasitəsilə Özgür Özəl rəhbərliyinin nəzarətində olan hesablara köçürülüb. Qeyd olunub ki, bu maliyyə fəaliyyəti ilə bağlı Ö.Özəl haqqında qısa zaman ərzində ilkin araşdırma başlanacaq.

Başqa bir iddia terror təşkilatına üzvlük ittihamları ilə bağlıdır. N.Başaran iddia edir ki, Ö.Özəl FETÖ ilə əlaqəli olduğuna görə ona qarşı ikinci bir cinayət işi də açılacaq.

N.Başaran həm Özgür Özəl, həm də digər CHP millət vəkillərinə qarşı irəli sürülən ittihamların yaxın aylarda Türkiyə Böyük Millət Məclisinə təqdim ediləcəyini bildirib. O partiyanın daxili balansını kökündən sarsıdacaq başqa bir iddia da irəli sürüb:

“Kamal Kılıçdaroğlu rəhbərliyi TBMM-yə təqdim ediləcək ittihamlara qarşı çıxmayacaq. Kılıçdaroğlu və onu dəstəkləyən CHP millət vəkilləri Özgür Özəl və ittihamlarda adı çəkilən digər millət vəkillərinin toxunulmazlığının qaldırılması lehinə mövqe tutacaqlar”.