Ukrayna üçün ən ciddi hərbi problem Rusiya ballistik raketlərini ələ keçirə bilən hava hücumundan müdafiə sistemlərinin çatışmazlığıdır.

Axar.az xəbər verir ki, bu barədə Ukrayna Silahlı Qüvvələrinin Baş Qərargah rəisi Andrey Qnatov bildirib.

“İlk növbədə söhbət Rusiyanın ballistik raketlərindən gedir. Təəssüf ki, əlimizdə olan vasitələr kifayət etmir. Düşmənin ballistik silahlarını vurmağa qadir sistemlərin daimi və kritik çatışmazlığını yaşayırıq. Bu gün üçün ən böyük çağırış məhz budur”, – deyə o bildirib.

Qnatovun sözlərinə görə, may ayında Rusiya Ukraynaya qarşı on minlərlə müxtəlif hava hücum vasitəsindən istifadə edib. Ukraynanın hava hücumundan müdafiə qüvvələri hava hədəflərinin təxminən 90 faizini məhv edib.

Ukrayna Baş Qərargah rəisi qeyd edib ki, ölkənin şəhərlərini və kritik infrastruktur obyektlərini tam qorumaq üçün hələ də kifayət qədər vasitələri yoxdur.

O əlavə edib ki, Ukrayna həmçinin uzaqmənzilli döyüş sursatları, bəzi növ pilotsuz uçuş aparatları, yerüstü robotlaşdırılmış komplekslər və radioelektron mübarizə vasitələri çatışmazlığı ilə də üzləşib.