Türkiyədə süni intellekt (Sİ) layihələrinin həyata keçirilməsi üçün ən azı 10 milyard dollar özəl vəsait ayrılacaq.

Axar.az xəbər verir ki, bu barədə Türkiyə Prezidenti Rəcəb Tayyib Ərdoğan məlumat verib.

"Türkiyə müdafiə sənayesində toplanmış təcrübə və imkanlarını digər sahələrə, xüsusən də süni intellekt sahəsinə ötürmək üçün intensiv səylər göstərir. Məlumat mərkəzi infrastrukturunun, bulud texnologiyalarının və süni intellektin inkişafı üçün ən azı 10 milyard dollar özəl investisiya səfərbər edəcəyik.

Dövlət investisiya proqramlarımızın ən azı 2%-ni süni intellekt layihələrinə ayıracağıq. 2030-cu ilə qədər ölkəmizdəki məlumat mərkəzlərinin quraşdırılmış tutumunu ən azı 1 GVt-a çatdıracağıq. Biz OECD, G20, BMT və digər beynəlxalq forumlarda insan mərkəzli süni intellekt standartlarının hazırlanmasında fəal rol oynayacağıq. Ümid edirəm ki, birlikdə Türkiyəni süni intellekt dövründə aparıcı ölkəyə çevirəcəyik", - deyə o əlavə edib.