Bu, Qırğızıstanın keçmiş prezidenti Əsgər Akayevin şəxsi fikridir, hakimiyyətin mövqeyi ilə heç bir əlaqəsi yoxdur.

Axar.az Teleqraf-a istinadla xəbər verir ki, bunu Qırğızıstan prezidentinin müşaviri Çolponbek Abıkeyev Akayevin dövlət başçısı Sadır Japarova əlavə prezidentlik müddətinin verilməsinin vacibliyi ilə bağlı açıqlamasını şərh edərkən deyib.

O bildirib ki, bu cür açıqlamaları həddindən artıq siyasiləşdirmək düzgün deyil:

“Bunu yalnız bir insanın şəxsi mövqeyi kimi qəbul etmək lazımdır. “Akayev dedisə, deməli belə olacaq” düşüncəsi ilə məsələni şişirtməyə ehtiyac yoxdur”.

Abıkeyev əlavə edib ki, yaxınlaşan prezident seçkilərində Sadır Japarovun yenidən namizəd olacağı gözlənilir, onunla yanaşı digər namizədlər də yarışa qatılacaq: “Kimin prezident olacağını xalq müəyyən edəcək. İndidən üçüncü müddət barədə danışmaq və məsələni gündəmə gətirmək yersizdir”.

Qeyd edək ki, Əsgər Akayev İssık-Kul Beynəlxalq Forumunun yubiley tədbirində çıxışı zamanı Sadır Japarova ölkəni idarə etmək üçün əlavə vaxt verilməsini təklif etmişdi.