Ukraynanın sabiq prezidenti Leonid Kuçma 1997-ci ildə Polşanın təltif etdiyi “Ag Qartal” ordenindən imtina edib.

Axar.az Azərtac-a istinadən xəbər verir ki, bu barədə Kuçma sosial media səhifəsində məlumat yayıb.

“Polşa Prezidenti Karol Navrotskinin Ukrayna Prezidenti Vladimir Zelenskini Polşanın “Ağ Qartal” ordenindən məhrum etmək qərarı ilə əlaqədar olaraq, 1997-ci ildə təltif olunmaqdan şərəf duyduğum bu ordendən imtina etmək qərarına gəldim”, - deyə Kuçma yazıb.

Kuçma əlavə edib ki, prezidentliyi dövründə Polşa ilə dostluq münasibətləri qurmağı prioritetlərdən biri hesab edib.

“Həmkarım Aleksandr Kvasnevski ilə birlikdə buna nail olmaq üçün hər cür səy göstərdik. Xalqlarımız arasındakı münasibətlərdə tarixi məsələlərin həllinə xüsusi diqqət yetirdik və bu, 2003-cü ildə barışıq haqqında birgə bəyanatımızla nəticələndi. Onilliklərdir ki, bu prinsip işləyir. Ukrayna ilə Polşa arasında əsl dostluq reallığa çevrilib. Bunu Rusiya tərəfindən tammiqyaslı işğalın ilk saatlarından bəri Polşanın Ukraynaya göstərdiyi əvəzsiz yardım təsdiqləyir. Əminəm ki, Prezident Navrotskinin hazırkı qeyri-dost addımı bütün bunları aradan qaldıra bilməz”, - deyə Kuçma vurğulayıb.

Ukraynanın sabiq prezidenti daha sonra qeyd edib:

“Amma bu gün Polşanın ali medalından imtina etməkdən başqa çarəm yoxdur. Ukrayna Rusiyanın əsassız tarixi iddialarını qəbul etməyərək müharibəni qəbul etdisə, bu gün digər ölkələr də tariximizi diktə edə və kimə hörmət etməli olduğumuzu müəyyən edə bilməz”.

Kuçma inanır ki, Ukrayna ilə Polşa arasındakı dostluq və müttəfiqlik davam edəcək.

“Amma bu gün kədər və narahatlıq hiss edirəm. Düşmən hücum edəndə bu bir məsələdir. Düşmənçilik dostları bir-birindən ayıranda isə tamamilə başqa bir məsələdir. Daha da qorxulu olanı bu dostlar da ortaq bir təhlükə ilə təhdid edildikdədir.

Tarixi xatırlamalıyıq. Lakin keçmiş gələcəkdən daha vacib ola bilməz.

Ukrayna və Polşanın bir-birinə həmişəkindən daha çox ehtiyacı var. Hər iki ölkənin siyasətçiləri bunu qəbul etməlidirlər. Mən onların müdrikliyinə güvənirəm”, - deyə Kuçma əlavə edib.