Fransanın cənub-qərbindəki Şərqi Pireney departamentində baş verən böyük meşə yanğını artıq 1500 hektar ərazini əhatə edib.

Axar.az xəbər verir ki, bu barədə departamentin prefekti Pyer Reno bildirib.

Onun sözlərinə görə, yanğın zolağının uzunluğu 18 kilometrdir. Yanğınla mübarizə üçün 700 yanğınsöndürmə, xilasetmə heyəti, təxminən 200 nəqliyyat vasitəsi, doqquz təyyarə və helikopter cəlb edilib.

Prefekt qeyd edib ki, təkcə bazar günü gecə yanğın Trivellaş kommunası yaxınlığında 900 hektardan çox əraziyə yayılıb.

Onun sözlərinə görə, güclü külək və əlçatmaz ərazi səbəbindən yanğının qarşısını almaq qeyri-mümkün olub.

Reno həmçinin xəbərdarlıq edib ki, hakimiyyət orqanları günün sonuna qədər çoxgünlük "Tur de Frans" velosiped yarışının bir mərhələsini ləğv etmək qərarına gələ bilərlər.