Türkiyənin xarici işlər naziri Hakan Fidan Fransanın paytaxtı Parisdə keçiriləcək Ukrayna mövzusunda "Könüllülər Koalisiyası"nın Liderlər Sammitində iştirak edəcək.

Axar.az xəbər verir ki, bu barədə Türkiyə mətbuatı məlumat yayıb.

Məlumata görə, Fidan sammitdə Türkiyə Prezidenti Rəcəb Tayyib Ərdoğanı təmsil edəcək. Nazir Parisdə keçirəcəyi görüşlərdə Ukraynanı tərəfdaşları ilə müzakirə edəcək.

Bildirilib ki, H.Fidan Türkiyənin Kiyevin müstəqilliyi, suverenliyi və ərazi bütövlüyünə verdiyi dəstəyi bir daha təsdiqləyəcək. O, həmçinin Rusiya-Ukrayna müharibəsi fonunda cəbhədəki son vəziyyət və müharibənin başa çatdırılmasına yönəlmiş diplomatik səylərin hazırkı mərhələsi ilə bağlı Ankaranın qiymətləndirmələrini təqdim edəcək.

Fidanın Türkiyənin Rusiya və Ukrayna nümayəndə heyətlərini yenidən danışıqlar masası arxasında bir araya gətirməyə hazır olduğunu vurğulayacağı gözlənilir.

Nazir Qara dənizdə sülh və sabitliyin qorunmasının Türkiyə üçün mühüm əhəmiyyət daşıdığını qeyd edərək, bu istiqamətdə səyləri dəstəkləməyə hazır olduqlarını ifadə edəcək.