01:08

ABŞ qüvvələri İran ərazisinə yenidən zərbələr endirir.

Axar.az xəbər verir ki, bu barədə “ABC Nyus” ABŞ administrasiyasındakı adının açıqlanmasını istəməyən rəsmiyə istinadla məlumat yayıb.

Mənbənin bildirdiyinə görə, hərbi əməliyyat artıq bir neçə saatdır davam edir.

ABŞ və İran rəsmiləri məsələ ilə bağlı hələlik rəsmi açıqlama verməyiblər.

***

ABŞ Silahlı Qüvvələrinin Mərkəzi Komandanlığı (CENTCOM) İran ərazisinə endirilən növbəti zərbələr seriyasının başa çatdığını bildirib.

Bu barədə CENTCOM-un bəyanatında deyilir.

Məlumata görə, ABŞ Hörmüz boğazı bölgəsində və İran sahillərində onlarla hərbi obyektə zərbələr endirib.

Qeyd olunur ki, əməliyyata qırıcılar, pilotsuz uçuş aparatları (PUA) və ABŞ Hərbi Dəniz Qüvvələrinin gəmiləri cəlb edilib. İranın raket və PUA komplekslərinin mövqelərinə, hərbi dəniz qüvvələrinin obyektlərinə və sahil müdafiə sistemlərinə zərbələr endirilib.

Komandanlıqdan bildirilib ki, yeddi saatlıq əməliyyat İranın kommersiya gəmiçiliyinə və mülki heyətlərə təhdid yaratmaq imkanlarının daha da azaldılmasına yönəlib.