Birləşmiş Ərəb Əmirlikləri Ukraynaya Qara dənizdə ticarət marşrutlarının təhlükəsizliyinin təmin olunmasında kömək edə bilər.

Axar.az xəbər verir ki, bunu Ukrayna Prezidenti Vladimir Zelenski BƏƏ Prezidenti Məhəmməd bin Zayed ən-Nəhyan ilə telefon danışığının yekunlarına dair açıqlamasında bildirib.

"Biz BƏƏ-nin Avropada, xüsusilə də Qara dəniz regionunda bizə necə kömək edə biləcəyini müzakirə etdik. Söhbət ərzaq təhlükəsizliyindən, dəniz marşrutlarının təhlükəsizliyindən və insan həyatının qorunması imkanlarının genişləndirilməsindən gedir. Həmçinin müxtəlif sahələrdə ikitərəfli layihələri müzakirə etdik. Bütün bunların həyata keçirilməsi üçün çalışırıq", – deyə Zelenski vurğulayıb.

O, həmçinin BƏƏ-yə vəziyyəti tam anlayışla qarşılamasına və Ukraynanın sülh səylərinə verdiyi dəstəyə görə təşəkkür edib.

"Ukrayna həmişə bizə kömək edənlərə dəstək verir. Bu il ukraynalılar tərəfdaşlarımızın Fars körfəzi regionunda təhlükəsizliyinin təmin olunmasına əhəmiyyətli töhfə veriblər", – deyə dövlət başçısı əlavə edib.