Rusiya Prezidenti Vladimir Putinin ən mühüm strateji tərəfdaşı olan Çin lideri Si Szinpinlə son görüşündənkeçən aylar ərzində müharibə şəraitində onların vəziyyəti müxtəlif istiqamətlərdə inkişaf edib və aralarındakı fərq getdikcə daha da dərinləşib. Rusiya yay aylarında Ukraynanın ölkənin neft-qaz sənayesinə və iqtisadi baxımdan həssas digər hədəflərə endirdiyi ağrılı zərbələrlə üzləşdiyi halda, Çin İranla müharibənin yaratdığı qlobal şokdan neft bazarları üzərində daha böyük təsir imkanları və Qərbin təzyiqinə qarşı daha yüksək dayanıqlılıqla çıxıb.

Axar.az xəbər verir ki, bu barədə "Voll Strit Jurnal" məlumat yayıb.

"İki liderin hakimiyyət və nüfuzunda dəyişən vəziyyət avqustun 31-də Qırğızıstanda keçiriləcək görüş zamanı diqqət mərkəzində olacaq. Həmçinin onların ABŞ hakimiyyətinə qarşı birgə müqaviməti də açıq şəkildə özünü göstərəcək. Görüş təhlükəsizlik məsələlərinə yönəlmiş 10 ölkədən ibarət Şanxay Əməkdaşlıq Təşkilatı sammiti çərçivəsində keçiriləcək. Təşkilata İranın da daxil olması beynəlxalq təcrid vəziyyətində olan rejimə əlavə beynəlxalq legitimlik qazandırır. Çin Tehran ABŞ-ın hərbi və iqtisadi təzyiqlərinin öhdəsindən gəlməyə çalışdığı bir vaxtda İrana maliyyə dəstəyi göstərib. Bu arada İran Rusiyanın Ukraynaya qarşı istifadə etdiyi ölümcül pilotsuz uçuş aparatlarını tədarük edib.

Ukraynadakı müharibə fonunda Rusiya necə Çinin kiçik tərəfdaşına çevrilir? Moskva keçmiş sovet respublikası olan Qırğızıstanda aviabaza saxlayır. Lakin Rusiyanın Ukraynada apardığı uzunmüddətli müharibə fonunda Moskvanın beynəlxalq nüfuzu zəiflədikcə, Çin bu ölkədə öz mövcudluğunu gücləndirib. Bu dinamika Mərkəzi Asiyanın hüdudlarından çox-çox kənara çıxır. Çinin daha dominant rolu Kremlin öz daxilində də hiss olunur: Rusiya iqtisadiyyatı Pekindən getdikcə daha çox asılı vəziyyətə düşdükcə, Putin artıq kiçik tərəfdaş rolunu qəbul etməyə məcburdur", - məlumatda deyilib.