Əgər Moldovada referendum təşkil olunsaydı, əhalinin 30,9%-i Avropa Birliyi, 44%-i isə Avrasiya İttifaqının tərkibində yaşamağı seçərdi.

Axar.az xəbər verir ki, bu nəticə Moldovada Soros Fondunun maliyyə dəstəyi ilə keçirilən sorğudan sonra əldə olunub. Sorğu iştirakçılarının 63,8%-i Moldovanın Rumıniyanın tərkibinə qatılmasının əleyhinə çıxıb. Üstəlik, respondentlərin 57,4%-i Moldovanın NATO-ya qəbul olunmasını istəmədiklərini bildirib.

Maraqlı məqam isə iştirakçıların SSRİ ilə bağlı fikirləri olub. Sorğuda iştirak edənlərin 57%-i kommunist rejimini bəyəndiyini, 23,6%-i isə nifrət etdiyini bildirib. 56% şəxs SSRİ-nin süqutuna təəssüf etdiyini açıqlayıb. 26,2% isə buna qarşı çıxıb. Üstəlik, respondentlərin 47,5%-i SSRİ-nin yenidən yaradılmasının, 48,5%-i isə ölkənin SSRİ-yə birləşdirilməsinin tərəfdarıdır.