01:02

ABŞ Maliyyə Nazirliyi Krımın ilhaqına və Ukraynanın şərqindəki münaqişəyə görə Rusiyaya tətbiq edilən sanksiyaları genişləndirib.

Axar.az xəbər verir ki, genişləndirilmiş sanksiya siyahısına 7 fiziki şəxs, onlarla təşkilat və Rusiya bayrağı altında üzən iki gəmi əlavə olunub.

Siyahıya əlavə olunan şəxslər Mixail Dedov, Mixail Klişin, Kiril Kovalçuk, Dmitri Lebedev, Dmitri Mansurov, Oleq Minayev və Yevgeni Priqojindir.

ABŞ Maliyyə Nazirliyi onların vəzifələri barədə əlavə məlumat verməyib.

BBC-nin Rusiya xidməti qara siyahıya salınan şəxslər barədə araşdırma aparıb. Məlum olub ki, “Rossiya” bankının top-meneceri Mixail Klişin, həmin bankın səhmdarı Yuri Kovalçukun qohumu, “Milli Media Qrupunun” başçısı Kiril Kovalçuk və biznesmen Yevgeni Priqojin ABŞ-ın qara siyahısına düşüb.

Priqojinə həm də “Putinin aşpazı” deyirlər və o, “kremlyönlü internet trolları fabriki”nin sahibidir.

Sanksiya siyahısına salınmış şirkətlər arasında isə “Trans-Flot”, “Krım Dəmir Yolları” və “Krım portları” firmaları var.

Siyahıya “Marşal Jukov” və “Stalinqrad” tankerlərinin də adları salınıb.

Bundan başqa, ABŞ hökuməti artıq siyahıda olan “Novatek” şirkətinin 26 filialına və Rosselxozbanka qarşı əlavə məhdidiyyətlər tətbiq edib.

Xatırladaq ki, ABŞ 2014-cü ildə Krımın ilhaqından sonra Rusiyaya müxtəlif sahələrdə sanksiyalar tətbiq edir. Bu siyahıda olanların ABŞ ərazisinə daxil olması qadağandır.