Taylandın Banq-Xen bölgəsindəki bir dəmir-dümür dükanında 227 kiloqram ağırlığında olan İkinci Dünya Müharibəsindən qalma bomba partlayıb, nəticədə 7 adam ölüb.

"Axar.az" xarici mətbuata istinadən xəbər verir ki, dünən Taylandda günorta saatlarında bomba partlaması nəticəsində 5 adam hadisə yerində ölüb.

Ölənlərin bədənlərinin parçaları hadisə yerindən 200 metr uzaqdan toplanıb. 2 adam da aparıldığı xəstəxanada ölüb.

Təxminən 20 adam da yaralanaraq xəstəxanaya aparılıb. Partlayışa səbəb olan 227 kiloqramlıq bombanın İkinci Dünya Müharibəsindən qaldığı bildirilir.

Bir inşaat işçisi qazıntı zamanı tikinti sahəsindən ağır dəmir parçası tapıb. Nə olduğunu bilmədiyi dəmir parçasını dəmir-dümür dükanına satıb. Dükan sahibi də aldığı dəmir parçasının bomba olduğunu bilməyib. Bu parçanı qazlı odla kəsməyə çalışarkən bomba partlayıb.

Partlayış ərazidə 4 metr genişliyində və 3 metr dərinliyində çuxur açıb. Ətrafdakı evlər də partlayış nəticəsində ziyan görüb, bir çox evin pəncərələri qırılıb, divarları dağılıb.