Terror təşkilatı PKK-nın özünüləğv qərarından sonra Türkiyəni tərk edəcək terrorçuların sayı bəlli olub.

Axar.az xəbər verir ki, bu barədə Türkiyə mətbuatı məlumat yayıb.

Bildirilib ki, terror təşkilatının Türkiyə, İraq, Suriya, Ermənistan və İranda yerləşən silahlı dəstələri İraqda təyin olunmuş nöqtələrdə toplanacaq.

Məlumata görə, hazırda Türkiyədə 580 terrorçu mövcuddur. Bu terrorçuların silahlarını yerə qoymaq üçün yaradılacaq təhlükəsiz dəhlizlərdən gedərək İraqın şimalına keçəcəkləri bildirilir.

Bundan başqa, terror təşkilatı üzvlərinin təslim etdiyi bütün silahlar qeydə alınacaq. Terrorçuların silahlarının mənsub olduğu ölkə, markası və növü kimi bütün detallar diqqətlə qeyd olunacaq.

Bundan əlavə, silahların təhvil-təslim prosesinin 3-4 ay ərzində başa çatdırılması gözlənilir. Həmçinin cinayətlə əlaqəsi olmayan təşkilat üzvləri vətəndaşı olduğu ölkələrə təhvil veriləcək.

Bu çərçivədə Türkiyənin təxminən 4 min vətəndaşının mərhələli şəkildə sərhəddə qəbul ediləcəyi qeyd olunur.

PKK-nın yüksək səviyyəli “liderləri” üçün isə vəziyyət fərqli qiymətləndirilir. Saylarının 300 olduğu deyilən terror təşkilatının “yuxarı” təbəqəsinin Türkiyədə olmasının riskli ola biləcəyi vurğulanır. Ona görə də həmin şəxslərin üçüncü ölkələrə göndərilməsi müzakirə edilə bilər.

PKK lideri Abdullah Öcalan üçün heç bir prosesin olmadığı, onun İmralıda qalmağa davam edəcəyi qeyd olunur.

Xatırladaq ki, ötən gün PKK özünüləğv qərarını açıqlayıb.