Rusiyanın Qazaxıstandakı fövqəladə və səlahiyyətli səfiri Mixail Boçarnikov bu gün sözügedən ölkənin Xarici İşlər Nazirliyinə çağırılıb.

"Axar.az" xəbər verir ki, rusiyalı diplomatın təcili şəkildə nazirliyə çağırılmasına səbəb Rusiyanın Xakasiya vilayəti parlamentinin sədri Vladimir Ştıqaşevin Qazaxıstana qarşı ərazi iddiası ilə çıxış etməsidir. Qazaxıstan Xarici İşlər Nazirliyinin mətbuat katibi Nurjana Aytmaxanova bildirib ki, rusiyalı siyasinin qeyri-konstruktiv çıxışı ölkəsinin narahatlığına səbəb olmaya bilməz:

"Hər halda hesab edirik ki, ya Ştıqaşev düşünmədən belə açıqlama verib, ya da media bunu təhrif edib. Ölkələrimiz arasında sərhədin delimitasiyası 2005-ci ildə başa çatıb. 2006-cı ilin yanvar ayının 12-də isə razılaşmanın son variantına dair müqavilələrə imza atılıb. Ölkələrimiz arasında dostluq əlaqələri var. Həm Qazaxısatan, həm də Rusiya bölgədə və dünyada təhlükəsizliyin qorunması üçün birgə səy göstərir. Ümid edirik ki, Rusiya hökuməti Ştıqaşevin ifadələrinə lazımı reaksiya verəcək".

Xatırladaq ki, Rusiyanın Xakasiya vilayəti parlamentinin sədri Vladimir Ştıqaşev dünən mediaya açıqlamasında Qazaxıstan ərazisinin bir hissəsinin Rusiyaya aid olduğunu və həmin əraziləri xalqın tələb etmə haqqını bildirmişdi.